Leopard Accident : बाळापुर–वाडेगाव मार्गावर सब स्टेशनजवळ भरधाव ट्रकच्या धडकेत एका बिबट्याचा जागीच मृत्यू झाला. वनविभागाने पंचनामा करून पुढील कारवाई सुरू केली आहे.
बाळापुर : बाळापुर ते वाडेगाव मार्गावर सब स्टेशनजवळ भरधाव ट्रकच्या धडकेत एका बिबट्याचा जागीच मृत्यू झाल्याची धक्कादायक घटना घडली. सकाळच्या सुमारास हा अपघात झाला. रस्त्यावर रक्ताचे डाग आणि मृत बिबट्याचे शरीर दिसताच परिसरात भीतीचे वातावरण पसरले.
घटनेची माहिती मिळताच वनविभागाचे अधिकारी व कर्मचारी तात्काळ घटनास्थळी दाखल झाले. मृत बिबट्याचा पंचनामा करून पुढील कायदेशीर प्रक्रिया सुरू करण्यात आली आहे. प्राथमिक तपासात अन्नाच्या शोधात किंवा जंगलातून रस्ता ओलांडताना बिबट्याचा ट्रकशी अपघात झाल्याचा अंदाज व्यक्त करण्यात येत आहे.
या परिसरात यापूर्वीही वन्यप्राण्यांच्या हालचाली वाढल्याचे स्थानिक नागरिकांनी सांगितले. त्यामुळे रात्रीच्या वेळी आणि पहाटे वाहनचालकांनी वेग मर्यादेत ठेवून अधिक सावधगिरी बाळगावी, असे आवाहन प्रशासनाकडून करण्यात आले आहे.
या घटनेमुळे पुन्हा एकदा वन्यजीव संरक्षण आणि रस्त्यावरील सुरक्षिततेचा प्रश्न ऐरणीवर आला असून, संबंधित विभागांनी तातडीच्या उपाययोजना कराव्यात, अशी मागणी नागरिकांकडून होत आहे.
