Bhubaneswar Explosion Case : ओडिशातील भुवनेश्वरजवळ सुंदरपदा परिसरात झालेल्या भीषण स्फोटाचे सीसीटीव्ही फुटेज समोर आले आहे. स्फोटक तयार करताना झालेल्या दुर्घटनेत मुख्य आरोपी शाहनवाज मलिकसह दोघांचा मृत्यू झाला असून एनआयएकडून तपास सुरू आहे.
भुवनेश्वर (ओडिशा) : ओडिशाची राजधानी भुवनेश्वरच्या बाहेरील सुंदरपदा परिसरात 27 जानेवारी रोजी सायंकाळी झालेल्या भीषण स्फोट प्रकरणात महत्त्वाचा घटनाक्रम समोर आला आहे. या स्फोटाचे सीसीटीव्ही फुटेज समोर आले असून, त्यामधून स्फोटाची तीव्रता स्पष्टपणे दिसून येत आहे. फुटेजमध्ये स्फोट इतका शक्तिशाली होता की परिसरात जोरदार धक्का बसला आणि नागरिक घाबरून घराबाहेर धावत आल्याचे दिसत आहे.
देशातील इतर महत्त्वाच्या घडामोडी वाचा 👉 (भारत)
स्फोटात चार जण गंभीर जखमी
मिळालेल्या माहितीनुसार, एका घराच्या छतावर स्फोटक सामग्री तयार केली जात असताना अचानक हा स्फोट झाला. या दुर्घटनेत एकूण चार जण गंभीररीत्या भाजले गेले. जखमींना तातडीने जवळील रुग्णालयात दाखल करण्यात आले. उपचारादरम्यान दोन जणांचा मृत्यू झाला असून उर्वरित जखमींची प्रकृती गंभीर असल्याची माहिती आहे.
गुन्ह्यासाठी बॉम्ब तयार केल्याचा संशय
घटनास्थळी पोहोचलेले डीसीपी जगमोहन मीणा यांनी सांगितले की, या प्रकरणातील मुख्य आरोपी शाहनवाज मलिक याचा गुन्हेगारी इतिहास आहे. प्राथमिक तपासातून हे स्पष्ट होत आहे की, काही गुन्हेगारी कृत्य करण्याच्या उद्देशाने येथे स्फोटक तयार केले जात होते. स्फोटक बनवित असतानाच हा स्फोट झाला.
या स्फोटात शाहनवाज मलिक, त्याची आई, त्याची बहीण आणि त्याचा मित्र अमित रंजन मलिक जखमी झाले. सर्वांना कॅपिटल हॉस्पिटलमध्ये दाखल करण्यात आले आणि प्राथमिक उपचारांनंतर खासगी रुग्णालयात हलविण्यात आले.
मुख्य आरोपी शाहनवाज आणि त्याच्या आईचा मृत्यू
ज्या घरात स्फोट झाला त्या ठिकाणी कुख्यात गुन्हेगार शाहनवाज राहत होता. स्फोटात गंभीर जखमी झालेल्या शाहनवाज उर्फ मफ्फीचा 4 फेब्रुवारी रोजी उपचारादरम्यान मृत्यू झाला. त्यानंतर 10 फेब्रुवारी रोजी त्याच्या आईचाही मृत्यू झाला. दोघेही गंभीररीत्या भाजले गेले होते.
देशभरातील क्राईम संबंधित ताज्या बातम्या येथे वाचा 👉 (गुन्हे वार्ता)
शाहनवाजविरुद्ध यापूर्वी विविध पोलीस ठाण्यांमध्ये खुनाचा प्रयत्न, बेकायदेशीर शस्त्र बाळगणे यांसारखे सुमारे सात गुन्हे नोंद असल्याची माहिती पोलिसांनी दिली आहे.
एनआयएची एन्ट्री; फॉरेन्सिक तपास सुरू
स्फोटाची गंभीरता लक्षात घेता राष्ट्रीय तपास संस्था (NIA) देखील तपासात सहभागी झाली आहे. पोलिसांनी घटनास्थळावरून माती आणि मलब्याचे नमुने गोळा केले असून फॉरेन्सिक तपासाद्वारे कोणत्या प्रकारचे स्फोटक वापरण्यात आले होते, याचा शोध घेतला जात आहे.
उर्वरित जखमींची चौकशी होणार
या प्रकरणातील चार जखमींपैकी शाहनवाज आणि त्याच्या आईचा मृत्यू झाला आहे, तर उर्वरित दोघांची प्रकृती अद्याप गंभीर आहे. ते बरे झाल्यानंतर त्यांची चौकशी करण्यात येणार असून अवैध स्फोटक निर्मितीत आणखी कोणाचा सहभाग होता का, याचा तपास केला जाणार आहे.
मोठ्या नेटवर्कचा संशय
तपास यंत्रणांच्या प्राथमिक हालचालींवरून ही घटना केवळ साधी गुन्हेगारी बाब नसून यामागे मोठे नेटवर्क किंवा कटकारस्थान असण्याची शक्यता तपासली जात आहे. मात्र, यासंदर्भात अद्याप अधिकृतरीत्या कोणतेही अंतिम विधान करण्यात आलेले नाही.
— प्रतिनिधी, महालोकवार्ता
(Disclaimer :सदर छायाचित्रे सोशल मीडियावर व्हायरल झालेल्या सीसीटीव्ही फुटेजवर आधारित असून त्याची स्वतंत्र पुष्टी महालोकवार्ताने केलेली नाही.)
