Gold Silver Price Drop : मुळे सोन्या–चांदीच्या दरात मोठी घसरण झाली आहे. सोने ३० हजारांनी तर चांदी प्रतिकिलो दीड लाखांनी स्वस्त झाली असून ग्राहकांसाठी खरेदीची संधी निर्माण झाली आहे.
नवी दिल्ली : राज्य आणि देशभरात सोन्या–चांदीच्या दरात सलग तिसऱ्या दिवशी मोठी घसरण नोंदवली गेली आहे. सोमवारी सकाळी ११ वाजता जाहीर झालेल्या दरांनुसार २४ कॅरेट सोन्याचे दर दहा ग्रॅमसाठी १ लाख ४९ हजार ९०० रुपये, तर २२ कॅरेट सोन्याचे दर १ लाख ४६ हजार ८०० रुपये इतके आहेत. याचवेळी चांदीचे दर प्रतिकिलो २ लाख ५१ हजार रुपयांवर आले आहेत. हे दर जीएसटी वगळता असून, अंतिम खरेदीवेळी त्यावर जीएसटी आकारण्यात येणार आहे.
अलीकडेच सोन्याच्या दरांनी उच्चांक गाठला होता. काही दिवसांपूर्वी २४ कॅरेट सोन्याचे दर दहा ग्रॅमसाठी तब्बल १ लाख ८० हजार रुपयांपर्यंत पोहोचले होते. मात्र सलग तीन दिवसांपासून सुरू असलेल्या घसरणीमुळे आता सोन्याचे दर जवळपास ३० हजार रुपयांनी खाली आले आहेत. यामुळे अल्पकालीन गुंतवणूक करणाऱ्या गुंतवणूकदारांना काही प्रमाणात आर्थिक फटका बसला असला, तरी सर्वसामान्य ग्राहकांसाठी आणि लग्नसराईच्या पार्श्वभूमीवर सोने खरेदीची अनुकूल संधी उपलब्ध झाली आहे.
चांदीच्या दरातही मोठी घसरण पाहायला मिळत आहे. काही दिवसांपूर्वी चांदीचे दर प्रतिकिलो साडेतीन लाखांचा टप्पा ओलांडले होते. मात्र बाजारातील नफेखोरी, आंतरराष्ट्रीय बाजारातील बदल आणि मागणीतील चढउतार यामुळे चांदीच्या दरात लक्षणीय घसरण झाली आहे. सध्याच्या घडीला चांदीचे दर जवळपास दीड लाख रुपयांनी कमी झाले असून, त्यामुळे चांदी खरेदी करणाऱ्या ग्राहकांमध्ये पुन्हा हालचाल वाढण्याची शक्यता वर्तवली जात आहे.
बाजारातील जाणकारांच्या मते, आंतरराष्ट्रीय आर्थिक घडामोडी, डॉलरमधील चढउतार तसेच जागतिक पातळीवरील अनिश्चितता यांचा थेट परिणाम सोन्या–चांदीच्या दरांवर होत आहे. सोन्या–चांदीच्या दरातील ही मोठी घसरण बाजारासाठी महत्त्वाची मानली जात असून, गुंतवणूकदारांनी सावध निर्णय घेण्याची गरज असताना सामान्य ग्राहकांसाठी मात्र ही वेळ खरेदीसाठी अनुकूल ठरत आहे.
