Delhi Capitals vs RCB IPL 2026 result : IPL 2026 मध्ये दिल्ली कॅपिटल्सचा आरसीबीवर ६ विकेट्सने दमदार विजय; केएल राहुलचे अर्धशतक, स्टब्सची नाबाद ६० धावा निर्णायक ठरल्या.
बंगळुरु : आयपीएल २०२६ च्या २६ व्या सामन्यात दिल्ली कॅपिटल्सने रॉयल चॅलेंजर्स बंगळुरूवर ६ विकेट्सने शानदार विजय मिळवत आपली ताकद दाखवली. एम. चिन्नास्वामी स्टेडियमवर झालेल्या या सामन्यात आरसीबीने प्रथम फलंदाजी करत २० षटकांत ८ बाद १७५ धावा उभारल्या होत्या. मात्र, दिल्लीने हा लक्ष्य पाठलाग करताना संयमित आणि प्रभावी खेळ करत सामना आपल्या नावावर केला.
आरसीबीकडून सलामीवीर फिल साल्टने ६३ धावांची दमदार खेळी करत संघाला चांगली सुरुवात करून दिली. त्याने विराट कोहलीसोबत पहिल्या विकेटसाठी ५२ धावांची भागीदारी केली. मात्र, कोहली १९ धावांवर बाद झाला. त्यानंतर टीम डेव्हिड (२६) आणि देवदत्त पडिक्कल (१८) यांनी काही प्रमाणात हातभार लावला, पण दिल्लीच्या गोलंदाजांनी मधल्या फळीत चांगली पकड ठेवत आरसीबीला १७५ धावांवर रोखले.
David Miller DOES IT IN STYLE! 👏
What a moment for him and what a victory for @DelhiCapitals 👌
Scorecard ▶️ https://t.co/vfJ6SccA9T#TATAIPL | #KhelBindaas | #RCBvDC pic.twitter.com/iaaHSqD9Ct
— IndianPremierLeague (@IPL) April 18, 2026
१७६ धावांच्या लक्ष्याचा पाठलाग करताना दिल्लीची सुरुवात डळमळीत झाली. पाथूम निसांका (१), करूण नायर (५) आणि समीर रिझवी (२) लवकर बाद झाल्याने संघ अडचणीत सापडला. मात्र, केएल राहुलने जबाबदारी स्वीकारत ५७ धावांची अर्धशतकी खेळी साकारली. त्यानंतर ट्रिस्टन स्टब्सने नाबाद ६० धावा करत डाव सांभाळला, तर कर्णधार अक्षर पटेलने २६ धावांचे योगदान दिले. शेवटी डेव्हिड मिलरने अवघ्या १० चेंडूत २२ धावांची वादळी खेळी करत दिल्लीला विजय मिळवून दिला.
दरम्यान, हा सामना आरसीबीसाठी ऐतिहासिक ठरला. एम. चिन्नास्वामी स्टेडियमवर त्यांनी खेळलेला हा १०० वा आयपीएल सामना होता. या मैदानावर १०० सामने खेळणारा आरसीबी हा आयपीएलमधील पहिला संघ ठरला आहे. मात्र, या ऐतिहासिक सामन्यात विजय मिळवण्यात त्यांना अपयश आले.
दिल्लीच्या या विजयामुळे स्पर्धेतील त्यांची स्थिती अधिक भक्कम झाली असून, संघाचा आत्मविश्वासही उंचावला आहे.
— प्रतिनिधी, महालोकवार्ता
👉 क्रीडा क्षेत्रातील महत्त्वाच्या घडामोडींसाठी वाचा : क्रीडा
