Agriculture shop inspection Amravati : खरीप हंगामाच्या पार्श्वभूमीवर अमरावती जिल्ह्यात कृषी विभागाची धडक मोहीम. अनियमितता आढळल्याने 10 कृषी सेवा केंद्रांचे परवाने निलंबित, 6 केंद्रांना ताकीद. शेतकऱ्यांना फसवणूक टाळण्याचे आवाहन.
अमरावती : आगामी खरीप हंगामाच्या पार्श्वभूमीवर शेतकऱ्यांची फसवणूक रोखण्यासाठी आणि कृषी निविष्ठांची गुणवत्ता सुनिश्चित करण्यासाठी जिल्हा कृषी विभागाने जिल्हाभरात तपासणी मोहीम राबवली आहे. या मोहिमेदरम्यान गंभीर अनियमितता आढळल्याने 10 कृषी सेवा केंद्रांचे परवाने निलंबित करण्यात आले असून 6 केंद्रांना कडक ताकीद देण्यात आली आहे.
👉 हे देखील वाचा : परतवाडा प्रकरणात आरोपी अयान अहमद ताब्यात; मोबाईल जप्त, डिजिटल पुराव्यांचा तपास सुरू
जिल्हा अधीक्षक कृषी अधिकारी राहुल सातपुते यांच्या मार्गदर्शनाखाली भरारी पथकांनी विविध भागातील कृषी केंद्रांची तपासणी केली. या तपासणीत ई-पॉस मशीनवरील नोंदी आणि प्रत्यक्ष साठ्यात तफावत, खतांची जास्त दराने विक्री, पक्के बिल न देणे, परवाना नसताना बियाण्यांचा साठा ठेवणे तसेच नोंदवही अद्ययावत न ठेवणे अशा गंभीर त्रुटी आढळल्या. काही ठिकाणी अनधिकृत एचटीबीटी कापूस बियाण्यांची वाहतूक व विक्री होत असल्याचेही निदर्शनास आले.
कृषी विभागाने एप्रिल 2026 अखेरपर्यंत जिल्ह्यातील सर्व विक्री केंद्रांची 100 टक्के तपासणी करण्याचे उद्दिष्ट ठेवले आहे. शेतकऱ्यांनी बियाणे व खते केवळ अधिकृत परवानाधारक केंद्रांकडूनच खरेदी करावीत, खरेदीवेळी पक्के बिल घ्यावे आणि बियाण्यांचे सील तपासावे, असे आवाहन प्रशासनाकडून करण्यात आले आहे.
👉 हे देखील वाचा : अमरावतीतील हनुमानगढी पर्यटन विकासाला मान्यता; १२१ कोटींच्या प्रकल्पाला मुख्यमंत्री फडणवीस यांची हिरवी झेंडी
तसेच, खतांच्या खरेदीवेळी ‘लिंकिंग’च्या नावाखाली अनावश्यक उत्पादने घेण्यास भाग पाडल्यास तक्रार करण्याचेही आवाहन करण्यात आले आहे. फसवणूक किंवा अवाजवी दर आकारल्यास शेतकऱ्यांनी तात्काळ तालुका कृषी अधिकारी किंवा जिल्हा गुणनियंत्रण निरीक्षकांशी संपर्क साधावा. यासाठी 8080536602 हा व्हॉट्सअॅप क्रमांकही जाहीर करण्यात आला आहे.
— प्रतिनिधी, महालोकवार्ता
👉 अमरावतीसह परिसरातील महत्त्वाच्या घडामोडींसाठी वाचा : विदर्भ
