Murtizapur murder confession arrest : मूर्तिजापूरात एक इसम स्वतःहून पोलीस ठाण्यात हजर होऊन पत्नीच्या खुनाची कबुली दिली. बैतूल (मध्यप्रदेश) येथील प्रकरणात आरोपीला पोलिसांनी ताब्यात घेत संबंधित पथकाच्या स्वाधीन केले.
मूर्तिजापूर (जि. अकोला) : शहरात एक धक्कादायक घटना उघडकीस आली असून, २५ एप्रिल २०२६ रोजी सकाळच्या सुमारास एक इसम स्वतःहून मूर्तिजापूर शहर पोलीस स्टेशनमध्ये हजर झाला. पोलिसांनी चौकशी केल्यानंतर त्याने दिलेल्या कबुलीजबाबाने खळबळ उडाली. संबंधित इसमाने १९ एप्रिल २०२६ रोजी मध्यप्रदेशातील बैतूल जिल्ह्यातील मीना डॅम येथे आपल्या पत्नी बाली मुंगीया जावरकर हिचा दगडाने ठेचून खून केल्याची कबुली दिली. खून केल्यानंतर मृतदेह डॅमच्या पाण्यात फेकून तो घटनास्थळावरून फरार झाल्याचेही त्याने स्पष्ट केले.
👉 हे देखील वाचा : निंभा अंधश्रद्धा प्रकरणात आरोपी अटकेत; पोलिसांची मोठी कारवाई
या गंभीर कबुलीनंतर मूर्तिजापूर शहर पोलिसांनी तत्काळ हालचाली करत घटनेची शहानिशा सुरू केली. यावेळी मध्यप्रदेशातील बैतूल बाजार पोलीस स्टेशनच्या पोलीस निरीक्षक अंजना धुर्वे यांच्याशी संपर्क साधण्यात आला. त्यांच्या माहितीनुसार, संबंधित आरोपीविरुद्ध अप. क्र. १२४/२०२६ अंतर्गत भारतीय न्याय संहितेच्या कलम १०३ (२) प्रमाणे खुनाचा गुन्हा आधीच दाखल असून आरोपी त्या घटनेपासून फरार असल्याचे स्पष्ट झाले.
यानंतर आरोपीची ओळख पटवून मूर्तिजापूर शहर पोलिसांनी त्याला तात्पुरत्या ताब्यात घेतले आणि पोलीस स्टेशनमध्ये आवश्यक सुरक्षा व्यवस्था ठेवली. दरम्यान, बैतूल बाजार पोलीस स्टेशनचे तपास पथक मूर्तिजापूर येथे दाखल झाल्यानंतर संबंधित आरोपीला त्यांच्या ताब्यात देण्यात आले. या कारवाईमुळे गंभीर गुन्ह्यातील फरार आरोपीला पकडण्यात यश आले असून पुढील तपासाला गती मिळाली आहे.
👉 हे देखील वाचा : मेडशीतील शाहबाबू फर्निचर दुकानाला भीषण आग; लाखोंचे नुकसान
स्वतःहून हजर, खुनाची कबुली; पोलिसांची तत्पर कारवाई
आरोपी स्वतःहून पोलीस स्टेशनमध्ये हजर होताच पोलिसांनी तात्काळ त्याची चौकशी करून प्रकरणाची शहानिशा केली आणि संबंधित राज्यातील पोलिसांशी समन्वय साधत आरोपीला त्यांच्या ताब्यात दिले. या तत्पर आणि समन्वयपूर्ण कारवाईमुळे एका गंभीर खुनाच्या गुन्ह्याचा तपास वेगाने पुढे सरकण्यास मदत झाली आहे.
ही कारवाई पोलीस अधीक्षक अर्चित चांडक, अप्पर पोलीस अधीक्षक चंद्रकांत रेड्डी तसेच उपविभागीय पोलीस अधिकारी वैशाली मुळे यांच्या मार्गदर्शनाखाली पोलीस निरीक्षक अजित जाधव, स.फौ. सुरेश पांडे, स.फौ. संतोष अंबिलवादे, पोहेकॉ इरफान्नोदिन, पोकॉ नामदेव आडे, पोकॉ पवन बोचरे, पोकॉ सुरेंद्र शेजव, पोकॉ शाम आठवे आदी अधिकारी व कर्मचाऱ्यांनी यशस्वीपणे पार पाडली.
प्रतिनिधी : महालोकवार्ता
