Palghar Women Entrepreneur Success Story : पालघर जिल्ह्यातील वनीता उराडे यांनी केवळ 10वी शिक्षणावर ‘वर्मी कंपोस्ट आणि नर्सरी’ व्यवसाय उभा केला. SHG आणि RSETI प्रशिक्षणाच्या मदतीने दरमहा 17 हजारांहून अधिक उत्पन्न; महिलांसाठी प्रेरणादायी यशोगाथा.
पालघर : घरची बेताची परिस्थिती, शिक्षण केवळ दहावीपर्यंत… आणि आयुष्य शेतीकामापुरतंच मर्यादित. पण मनात एक हट्ट होता—“स्वतःचं काहीतरी करायचंच!” हीच जिद्द घेऊन रोठे येथील सौ. वनीता विनोद उराडे यांनी आपल्या आयुष्याची दिशा बदलून टाकली.
👉 हे देखील वाचा : महिला आरक्षण विधेयक नामंजूर; मोदी सरकारला मोठा धक्का
दिवसभर शेतीत काम करताना वनीता ताईंच्या मनात एकच विचार घोळत होता. “मी स्वतःचा व्यवसाय करू शकते का?” या प्रश्नाचं उत्तर त्यांना मिळालं स्वयं सहायता गट (SHG) आणि EAP कार्यक्रमाच्या माध्यमातून. इथूनच त्यांना ठाण्यातील महाबँक RSETI या संस्थेची माहिती मिळाली आणि आयुष्याला नवं वळण मिळालं.
१० दिवसांचे प्रशिक्षण… आणि आत्मविश्वासाचा जन्म
२३ जानेवारी ते १ फेब्रुवारी २०२३ दरम्यान त्यांनी ‘पॉलीहाऊस आणि शेडनेट शेती’ या विषयावर प्रशिक्षण घेतलं. हे प्रशिक्षण फक्त तांत्रिक नव्हतं, तर ते त्यांच्या आत्मविश्वासाचा पाया ठरलं. तसेच आधुनिक शेती + व्यवसाय कसा करायचा, याचा स्पष्ट मार्ग मिळाला.
छोट्या गुंतवणुकीत मोठी सुरुवात
प्रशिक्षण संपताच त्यांनी वेळ न दवडता २७ फेब्रुवारी २०२३ रोजी १.०५ लाख रुपयांची गुंतवणूक करून ‘वर्मी कंपोस्ट आणि नर्सरी’ व्यवसाय सुरू केला. बँक कर्जाने आधार मिळाला, पण खरा आधार होता तो त्यांचा स्वतःवरचा विश्वास.
आजची ओळख – “यशस्वी उद्योजिका”
आज त्यांच्या रोपवाटिकेत विविध प्रकारची झाडं, आणि उच्च दर्जाचं गांडूळ खत उपलब्ध आहे.
दरमहा १७,००० रुपयांपेक्षा जास्त उत्पन्न
कुटुंबाला आर्थिक स्थैर्य
समाजात “उद्योजिका” म्हणून नवी ओळख
बदल फक्त पैशात नाही, व्यक्तिमत्त्वातही
एकेकाळी केवळ गृहिणी म्हणून ओळख असलेल्या वनीता ताई…
आज: आत्मविश्वासाने बोलतात, निर्णय स्वतः घेतात, इतर महिलांसाठी प्रेरणा ठरतात.
👉 राज्यातील ताज्या घडामोडींसाठी वाचा : महाराष्ट्र
वनीता ताईंचं स्वप्न फक्त स्वतःपुरतं नाही
“माझ्यासारख्या महिलांना रोजगार मिळावा” त्यांचा प्रवास आज पालघर जिल्ह्यातील शेकडो महिलांसाठी आशेचा किरण ठरत आहे. जिद्द, मेहनत आणि योग्य मार्गदर्शन मिळालं… तर दहावीपर्यंत शिकलेली महिला देखील यशाचं शिखर गाठू शकते, हे वनीता ताईंनी करून दाखवलं!
— प्रतिनिधी, महालोकवार्ता
